Tlf. 988 205 134    |    Fax 988 205 107   |   info@concellodecoles.com
Web en Galego GALEGO    |    Web en Castellano CASTELLANO

Últimas Novas de Coles

ABERTO NOVO PRAZO RENOVACIÓN E NOVO INGRESO ESCOLA INFANTIL DE COLES "A GALIÑA AZUL"

10/03/2018 - Novas do Concello

O pasado 9 de de marzo, o Diario Oficial de Galicia publicou a convocatoria do proceso ordinario de matrícula para nenos de 0 a 3 anos nas escolas infantís da rede autonómica de escolas infantís “A Galiña Azul”, na que establece os requisitos e procedementos para solicitar as prazas.

Segundo sinala ese anuncio do D.O.G., o prazo para a presentación de solicitudes de renovación de praza ou de novo ingreso será dende o 10 de marzo ata o 9 de abril (ambos, incluídos).

Para máis información: Escola Infantil de Coles "A GALIÑA AZUL", número de teléfono 988 204 466.


DECLARACIÓN 8 DE MARZO - DÍA INTERNACIONAL DA MULLER

05/03/2018 - Novas do Concello

No DÍA 8 DE MARZO, o concello de COLES manifesta un ano máis o seu compromiso coas mulleres, coa defensa dos seus dereitos e coas políticas de igualdade como instrumento para avanzar cara unha sociedade na que as mulleres sexan donas e exerzan dende a súa liberdade o protagonismo das súas propias vidas. 

O concello de  COLES súmase ó apoio da convocatoria da folga de mulleres prevista para o 8 de marzo de 2018 no marco dunha xornada internacional de paros e mobilizacións para reivindicar a igualdade de oportunidades nas condicións de traballo, na esfera social e no dereito a vivir sen violencias.

A folga feminista do 8 de marzo pretende ser unha chamada de atención, dende o ámbito local máis próximo ó internacional, sobre a desigualdade e invisibilidade que historicamente sofren as mulleres, co obxectivo de esixir a mellora das súas condicións sociais e laborais para combater as discriminacións laborais agravadas pola medidas aplicadas baixo a coartada de crise económica.

O Concello de Coles fai un chamamento ás traballadoras e traballadores a secundaren a convocatoria de paros laborais, de manifestacións e mobilizacións que se leven a cabo con motivo do 8 de marzo, para reiterar o noso compromiso activo coa eliminación da discriminación laboral, económica e social das mulleres, que pasa polos seguintes puntos fundamentais:

- Avanzar na eliminación das violencias machistas, garantindo o estrito cumprimento do compromiso económico, seguimento e avaliación das medidas acordadas no Pacto de Estado en materia de Violencia de Xénero.

- Impulsar o diálogo social e a negociación colectiva, incrementar as políticas activas de emprego, esixir plans de igualdade en tódalas empresas obrigadas por lei e establecer medidas de acción positiva, imprescindibles para combater as brechas de xénero no emprego, avanzar en conciliación e corresponsabilidade e eliminar as desigualdades na protección social.

- Incrementar os recursos técnicos e humanos da inspección de traballo, e mellorar os criterios de vixilancia e control do cumprimento da igualdade efectiva entre mulleres e homes no ámbito laboral.

- Activar políticas e medidas efectivas de corresponsabiliade, para que os coidados se repartan equitativamente entre mulleres, homes, a sociedade e o Estado, como a aprobación da quinta semana do permiso de paternidade, postergada polo Goberno, ou a retribución das excedencias por coidado familiar, en liña coas propostas aprobadas pola Comisión Europea en 2017.

- Fortalecer os servizos públicos, especialmente en educación, sanidade e servizos sociais, impulsando un modelo educativo igualitario que combata os estereotipos sexistas, así como garantir as infraestruturas públicas necesarias para a atención a maiores, persoas dependentes e menores, especialmente de 0 a 3 anos. -

Promover unha lei para a igualdade salarial, e avanzar na representación paritaria nos distintos órganos de representación e decisión do conxunto das estruturas sociais e económicas da sociedade española.

- Ratificar o Convenio 189 da Organización Internacional do Traballo (OIT) sobre o traballo digno das traballadoras do fogar. - Promover de xeito activo, dende a representación de España na OIT, a aprobación dun Convenio Internacional contra a violencia de xénero no lugar de traballo.

Por todas estas razóns e en definitiva porque malia ós avances en políticas de igualdade, aínda persisten graves discriminacións de xénero e estereotipos de carácter sexista que impiden ás mulleres participar en igualdade de condicións, este 8 de Marzo e tódolos días do ano, débennos facer reflexionar ó conxunto da sociedade sobre a realidade que teñen as mulleres no noso país, e de que modo contribuímos dende os distintos ámbitos políticos, institucionais e de goberno a establecer as medidas necesarias para modificar esta realidade.

Non pode haber unha sociedade verdadeiramente democrática se non somos capaces de eliminar os comportamentos e actitudes machistas que atentan contra máis da metade da poboación. O machismo, froito do patriarcado máis rancio e máis prexudicial para as mulleres esténdese en tódolos ámbitos, dende o familiar, social e laboral ata a máis cruel das manifestacións como é a violencia de xénero que se exerce cara ás mulleres. Unha sociedade libre de machismo é o noso obxectivo.

Porque non poderá haber progreso social se non se recoñece o talento e a capacidade das mulleres nos diferentes ámbitos da sociedade, así como a súa contribución ó desenvolvemento económico e social do noso país.

O 8 de marzo, non pode ser simplemente unha data máis de conmemoración dun Día Internacional, é unha data histórica e clave na loita do feminismo e para millóns de mulleres no mundo, esta data é ante todo unha xornada de loita, de sensibilización e concienciación ante o conxunto da sociedade do camiño que aínda temos que percorrer para acadar a igualdade real e efectiva entre homes e mulleres.


V RUTA CABALAR CONCELLO DE COLES

01/03/2018 - Novas do Concello

O próximo domingo 25 de marzo, terá lugar a V Ruta Cabalar Concello de Coles.

Os asistentes a este evento poderán gozar dunha amena ruta a cabalo polas fermosas paraxes do municipio.

A saída será dende o Polideportivo de Albán, ás 11 horas, coa recepción de animais a partir das 10:00 horas.

A ruta terá un percorrido de 20 km aproximadamente.

Ás 13:30 horas será a comida no Polideportivo de Albán e ás 16:30 horas terán lugar as carreiras nas inmediacións do Polideportivo. 

Ó remate das carreiras levarase a cabo o sorteo de diversos regalos e realizarase a entrega de premios.

O prazo de inscrición remata o xoves día 22.

O prezo será de 20 € por persoa (inclúe bocadillo quente e comida - A cargo de "Taberna Malé" A Peroxa -)

Os nenos/as menores de 10 anos gratis.

Será necesario confirmar asistencia a través dos teléfonos 679 316 665 (Sergio) e 637 735 381 (Antonio).


PLAN MARCO CONCELLO DE COLES "Mellora da capa de rodadura"

17/02/2018 - Novas do Concello

Nos próximos días, o Concello de COLES vai iniciar os traballos de mellora de vías municipais, dentro do plan municipal de obras. En concreto, estas están incuídas no PLAN MARCO "PLAN DE MELLORA DE CAMIÑOS MUNICIPAIS 2017-2018", que van a consistir en realizar dúas actuacións na Parroquia de Ribela (San Xillao):

- Mellora de camiño en O Pazo:

Esta actuación consistirá no acondicionamento do camiño que dá acceso ó lugar de Ou Pacios ou Aldea de Se en Carballedo, desde as inmediacións da estrada provincial de Barra de Miño, dando servizo ás leiras que existen a ámbolos dous lados do camiño. Con esta actuación preténdese a execución dun novo firme de formigón nun camiño hoxe totalmente deteriorado e en pésimas condicións de uso.

- Mellora de Camiño en Prados.:

Esta actuación consistirá no acondicionamento do camiño situado no Lugar de Prados. Trátase do mantemento da pista, a base do movemento de terras normal da retroexcavadora para a apertura da caixa e achega de zahorra para a execución dun bo firme.

O importe total das obras é de 49.162,30 €. O concello de Coles financia o 21% destas obras, mentres que o 79% restante procede do Fondo Europeo Agrario de Desenvolvemento Rural (FEADER, que aporta o 75% desta parte), o Ministerio de Agricultura, Alimentación e Medio Ambiente (MARM, que aporta o 7,5% de dita parte) e a Axencia Galega de Desenvolvemento Rural (AGADER, de quen procede o 17,5% restante da antedita proporción).


AUDITORIO DE COLES - FEBREIRO E MARZO

16/02/2018 - Novas do Concello

Ó longo dos meses de febreiro e marzo vanse realizar as seguintes actuacións no Auditorio de Coles:

O domingo día 25 de febrerio, o grupo “OS MENINOS” farannos un percorrido pola música portugusesa.

O domingo día 4 de marzo, a quenda será para o grupo “CLAVE DE FADO”, formación galega nacida a finais de 2009 con sons máis característicos de Galicia e Portugal (fados, bossasfadeiras,) e tamén en clave de bossa-nova.

O domingo día 11 de marzo, vai ofrecernos un concerto o grupo “Cantareiras Charamusga” da Escola de Música de Coles, formado por veciñas e veciños do noso concello.

Este concerto vai ser para conmemorar o Día da Muller, que se celebra o 8 de marzo. Este día, declarado oficialmente pola ONU en 1975, é un recoñecemento ás mulleres como artífices da historia e da loita pola súa liberación e igualdade co home. Reivindícase a todas as mulleres e a igualdade completa de dereitos.

Pero no 2018 aínda hai pouco que celebrar, e moito que reclamar: a fin da discriminación, que se erradiquen as violencias machistas, que se acade a igualdade salarial, a universalización dos coidados, o dereito para decidir, a libre elección... e a erradicación dos asasinatos machistas, unha verdadeira lacra. Non podemos seguir permitindo esta ideoloxía machista na que algúns homes se cren co dereito de asasinar mulleres polo mero feito de ser mulleres.

Seguiremos o domingo día 18 de marzo, co grupo de Percusión "ODAIKO", un concerto para que o público esperte o seu enxeño e se achegue ó fermoso mundo do espectáculo. Concerto no que o grupo ODAIKO fará fincapé nos tres elementos que sempre a caracterizaron como banda: o virtuosismo, o humor e a posta en escena. Juan Collazo, Antonio Ocampo, Félix Rodríguez e Fran Troncoso forman Odaiko Percussion Group. Odaiko é un grupo de percusión contemporánea que fusiona sons do jazz, o flamenco, o folk e mesmo sons traídos da música tradicional hindú e senegalesa.

Todos os concertos van ser ás 18:30 h.


 

Icono de conformidad con el Nivel Doble-A, 
	de las Directrices de Accesibilidad para el 
	Contenido Web 1.0 del W3C-WAI ¡CSS Válido!Valid XHTML 1.0 Transitional
Programación e Deseño Web: Ainet Consulting
(C) Concello de Coles - Aviso Legal