Novas do Concello

BOTANDO REDES

Coa posta en marcha deste primeiro ciclo de talleres ó que denominamos BOTANDO REDES, pretendemos achegar as novas tecnoloxías a toda a sociedade, xa que supón importantes vantaxes sobre todo para as persoas maiores, pero resulta evidente que existe un distanciamento que xera desigualdade no uso e proveito destas.

As novas tecnoloxías que para algúns deles son totalmente alleas, dende o propio manexo do ordenador e móbil, ata o coñecemento das redes sociais, uso de internet, conta de correo, videoconferencia etc., sendo un medio idóneo para ampliar as súas relacións sociais, posibilitando o contacto diario con familiares e amigos, facilitando o acceso a calquera tipo de información que lles sexa de interese: prensa diaria, cultura, saúde, etc. Así como o uso de móbiles como medio de comunicación e futuros dispositivos tecnolóxicos con aplicacións sociais e sanitarias de emerxencia. Os resultados obtidos van resultar unha motivación para os usuarios, descubrir as múltiples aplicacións do manexo destas tecnoloxías que nos fan a vida máis doada.

En definitiva, grazas ós adiantos da tecnoloxía, os nosos maiores poden vivir no seu fogar e cidade cunha mellor calidade de vida, evitando os efectos que o illamento e a dependencia puidera provocar.

Os talleres realizaranse na aula de informática os venres, días 10, 17 e 24 de abril e 8, 15, 22 e 29 de maio ás 18 horas.

As prazas son limitadas e é necesaria a inscrición nas oficinas do concello ou ben por teléfono.

PROXECTO DE POSTA EN VALOR DO INTERIOR DOS NUCLEOS.

O Alcalde, Manuel Rodriguez, ven de presentar un proxecto de arranxo de rúas internas de núcleos e recollida de augas chovedizas.

O comezo de estas obras forman parte de un ambicioso proxecto de posta en valor do interior dos núcleos rurais, o que se pretende realizar na maioría dos núcleos do concello.

O que se vai a facer con estes proxectos, e acondicionar as rúas interiores dos núcleos, as rúas principais dos núcleos, nas cales a capa de formigón atopase bastante deteriorada, e moi parcheada o longo dos anos.

O que se pretende e mellorar a situación actual do pavimento e dotalo con servizos necesarios para os veciños e mellorar o sistema de drenaxe recollendo as augas chovedizas.

Esta recuperación farase de maneira integral, dando un valor engadido o utilizar pedra, lastra e formigón. Nesta primeira fase os núcleos nos que se van a realizar esta as obras son Vilarnaz, A Reguenga, Tras do Río e Miegodevila.

As obras, por un importe de 127.660 €, executaranse integramente con fondos propios do CONCELLO.

O CONCELLO EXECUTARÁ OBRAS DE ALUMEADO PÚBLICO E REDE DE SUMIDOIROS

No vindeiro mes de Abril o Concello de Coles vai levar a cabo as obras de Rede de Sumidoiros e Mellora do Alumeado Público en distintos núcleos, por un importe total de 299.230 € con cargo a fondos do CONCELLO.

Estas obras foron aprobadas no presuposto municipal do ano 2.015 , no pleno que tivo lugar no pasado mes de outubro.

As obras que se van a executar son as seguintes:

REDE DE SUMIDOIROS SEQUEIROS - SEOANE

REDE DE SUMIDOIROS DE A LAVANDEIRA

REDE DE SUMIDOIROS A ZARRIÑA – PAVILLON

REDE DE AUGAS CHOVEDIZAS EN GUSTEI

MELLORA DO ALUMEADO EN VILARNAZ

MELLORA DO ALUMEADO EN BELESAR

MELLORA DO ALUMEADO PARROQUIA A BARRA

Subvencións da Xunta para cubertas e fachadas de vivendas

O Concello de Coles informa sobre axudas da Xunta de Galicia para a rehabilitación de cubertas e fachadas de vivendas.

No Diario Oficial de Galicia (DOG) nº 50, do 13 de marzo, a Consellería de Economía e Industria publica subvencións destinadas á rehabilitación con granito das fachadas e á renovación de cubertas de lousa e de tella cerámica.

O prazo de presentación de solicitudes abriuse o día 14 de marzo de 2015 e prolongaraseata que se esgoten os fondos económicos. En todo caso, finalizará cumpridos tres meses dende o día seguinte da publicación da orde que regula as citadas subvencións.

No suposto de que antes de finalizar o prazo de presentación de soli¬citudes se esgote o crédito, esta información será publicada no DOG e na páxina web da consellería.

A información sobre os requisitos para acceder a estas axudas así como a contía das mesmas figura no DOG nº 50 do 13 de marzo.

Contacto: Páxina web oficial da consellería: http://economiaeindustria.xunta.es

Teléfono: 981 95 70 92 / 981 95 72 59

Enderezo electrónico: cei.sxai@xunta.es

CLAUSURA II OBRADOIRO DA MANCOMUNIDADE DE SANTA ÁGUEDA

O xoves 12 foi a clausura e entrega de diplomas do obradoiro de emprego “Santa Águeda II” promovido polos concellos que integran a Mancomunidade de concellos do mesmo nome, é dicir, Coles, Amoeiro, A Peroxa, e Vilamarín.

Este obradoiro púxose en funcionamento o pasado mes de agosto e nel participaron 21 desempregados como alumnos de albanelería.

 Durante estes últimos anos, o Concello de Coles dirixiu unha notable proporción de recursos cara a creación e rehabilitación de espazos públicos, recuperando e conservando o patrimonio municipal e proporcionando así a posibilidade dunha maior participación cidadá. Un destes recursos para a recuperación e rehabilitación de espazos públicos foi o II Obradoiro da Mancomunidade de Santa Águeda.

Co traballo de rehabilitación do Obradoiro de Emprego, en Coles recuperáronse: a vella Escola de Miegodevila e a planta inferior da Escola de Cambeo. Servindo así a primeira como local para a Asociación de Mulleres Rurais, e a segunda como centro multiusos ó servizo da veciñanza e da Escola de Música.

Tal empresa foi posible grazas a intervención exemplar da dirección, dos monitores, e do alumnado deste obradoiro (parte do cal son veciños e veciñas de Coles) que xestionaron eficazmente os recursos e traballaron a reo para avanzar moito máis aló do previsto, con resultados que superaron amplamente as expectativas iniciais

Así, a partida de 25.000 euros da que se dispuña para restaurar ambos locais, foi distribuída do seguinte xeito: En Miegodevila: cambiáronse caleiros e tellado, pintáronse paredes, puxéronse novas ventás, colocouse tarima e chan e púxose aire acondicinado, tamén se axardinou o exterior, canalizáronse augas chovedizas e fecais e acondicionouse un local de unión deste co local social. Pintouse o local da Asociación de Veciños e tamén se instalou aire acondicionado e WIFI gratuíta.

En Cambeo: cambiouse a instalación eléctrica e instaláronse luces LED novas en todo o edificio, insonorizouse e aproveitouse o espazo do local, unindo varios departamentos pequenos e inutilizados a outro de maior tamaño, facendo así unha sala máis espaciosa e aproveitable.

Á mellora destas infraestruturas públicas engádese, así mesmo, unha innovación común: a dispoñibilidade de WIFI gratuíta.

Para dar continuidade a estas políticas, na axenda municipal figura, así mesmo, a restauración do antigo concello, o illamento do pavillón e a reforma da planta superior da Escola de Gustei, proxecto xa presentado no seo do III Obradoiro da Mancomunidade Santa Águeda 2015.